Athafnasvæði Havsbrúnar í Fuglafirði í Færeyjum.

Havsbrún í Færeyjum semur um HPP-4000 verksmiðju frá Héðni

Fiskmjöls- og fiskfóðurframleiðandinn P/F Havsbrún í Færeyjum hefur gengið frá samningi við Héðin um kaup á HPP-4000 verksmiðju til framleiðslu á mjöli og lýsi úr laxaslógi. HPP er skammstöfun á Héðinn Protein Plant, sem Héðinn hefur verið að þróa og fullkomna á síðustu árum til að gjörnýta hráefni sem fellur til við fiskeldi og veiðar. HPP verksmiðjan er samsett úr nokkrum einingum sem framleiddar eru hjá Héðni og hægt er að flytja með gámum hvert sem er í heiminum.

HPP-4000 verksmiðjan sem Havsbrún kaupir getur unnið úr 90-100 tonnum af hráefni á sólarhring, en það gefur 14-20 tonn af mjöli og 15-25 tonn af lýsi á sólarhring. Verksmiðjan skilar bestu mögulegri nýtingu hráefnis og betri orkunýtingu en þekkst hefur hingað til.

Bakkafrost, móðurfyrirtæki Havsbrúnar, er eitt stærsta fyrirtæki Færeyja, með laxeldi á 19 stöðum í eyjunum.

Smíði HPP-4000 verksmiðjunnar er þegar hafin og er áætlað að hún verði sett upp og komin í notkun í Færeyjum fyrir árslok 2017. Verksmiðjan verður staðsett í Fuglafirði, en þar er fyrir fiskimjölsverksmiðja Havsbrúnar.

Hráefnið til verksmiðjunnar kemur úr laxeldi Bakkafrosts í Færeyjum, sem er móðurfyrirtæki Havsbrúnar. Bakkafrost er eitt stærsta fyrirtæki Færeyja, með rúmlega sjö hundruð starfsmenn. Fyrirtækið veltir rúmlega 40 milljörðum króna á ári og þar af veltir Havsbrún um 16 milljörðum króna. Meirihlutinn af framleiðslu Havsbrúnar fer í fiskeldisfóður í stöðvum Bakkafrosts. Á árinu 2015 framleiddi Havsbrún um 80 þúsund tonn af mjöli og lýsi úr 235 þúsund tonnum af sjávarafla, einkum kolmunna.

HPP verksmiðjurnar geta framleitt mjöl og lýsi hvort sem er í landi eða úti á sjó.

Laxamjöl streymir úr HPP verksmiðju Arctic Protein í Borgarnesi.