Hinn nýi frystitogari sem smíðaður verður fyrir HB Granda er hannaður af Rolls-Royce Marine.

Nýr frystitogari HB Granda hannaður hjá Rolls-Royce Marine

Stjórn HB Granda hf. hefur ákveðið að ganga til samninga við spænsku skipasmíðastöðina Astilleros Armon Gijon, S.A. um smíði á nýjum frystitogara á grundvelli tilboðs frá skipasmíðastöðinni.

Togarinn er hannaður af Rolls Royce í Noregi og er 81 m langur, 17 m breiður og hefur lestarrými fyrir um 1.000 tonn af frystum afurðum á brettum. Samningsupphæðin mun liggja nærri 5 milljörðum króna. Áætlað er að gangi samningar eftir muni skipið verða afhent á árinu 2019.

Ekki eru fyrirhugaðar frekari nýsmíðar af hálfu HB Granda að svo stöddu. Félagið gerir nú út 3 frystitogara sem eru byggðir á árunum 1988-1992, 4 ísfisktogara og 2 uppsjávarveiðiskip.