Hárnákvæmt tímaskipulag í Svartsengi

Teymi frá Héðni hafa undanfarna mánuði verið að störfum í skiljustöð HS Orku í Svartsengi við umfangsmikla endurnýjun á gufuskiljum stöðvarinnar. Markmiðið er að auka afköst orkuversins og tryggja hagkvæmni í rekstri. Framkvæmdirnar krefjast hárnákvæms tímaskipulags þar sem skiptin fara fram í stuttum, fyrir fram ákveðnum vinnsluhléum svo að vinnsla í orkuverinu stöðvist sem allra styst að sögn Einars Vals Skagfjörð Einarssonar, deildarstjóra sölu- og verkefnastýringar hjá Héðni.

„Nýju skiljurnar eru helmingi afkastameiri og um tvöfalt stærri en þær gömlu – þyngdin fer úr sextán tonnum í heil 32 tonn á hverri skilju. Vegna stærðar nýju tækjanna og mikilvægis þess að lágmarka niðritíma orkuversins krefst verkefnið hárnákvæmrar skipulagningar.“

Fyrsta gamla gufuskiljan var tekin úr rekstri í fyrrasumar. Til þess að verkið gengi sem hraðast á staðnum og þessi 32 tonna búnaður félli fullkomlega að lagnakerfinu voru allar tengilagnir forsmíðaðar á verkstæði Héðins. Í sumar héldu viðamiklar breytingar áfram bæði innan- og utandyra við skiljustöðina, þar sem gamli lagnastamminn utan við stöðina var tekinn úr notkun og nýr, afkastameiri stammi tekinn í notkun sem sömuleiðis var forsmíðaður á verkstæðinu. Á sama tíma var seinni gamla skiljan tekin úr sambandi og nýja skiljan hífð á svæðið.

Uppsetningin fylgir sérstökum áskorunum þar sem lagnagryfjan undir nýja skiljustæðið er ekki tilbúin. Á meðan Ístak lýkur við jarðvegsvinnuna leysir Héðinn málið með því að hýsa þessa 32 tonna skilju tímabundið á sérsmíðuðum búkkum þar til henni verður komið fyrir á endanlegum undirstöðum. Verkefnið er mikilvægur liður í víðtæku og traustu samstarfi Héðins og HS Orku á svæðinu.

Kynntu þér lausnir Héðins fyrir orkuver eða hafðu samband við sérfræðinga okkar til að fá nánari upplýsingar um iðnaðarþjónustu og flókin uppsetningarverkefni.