Héðinn Protein Plant (HPP) er byltingarkennd próteinverksmiðja sem Héðinn hefur þróað og smíðað. Um er að ræða nýtt framleiðsluferli, sem er hagkvæmt fyrir framleiðslu mjöls og fiskolíu við aðstæður þar sem slík verðmætavinnsla hefur ekki áður komið til greina. HPP verksmiðjan hentar hvort sem er til verðmætaframleiðslu á sjó eða í landi.

HPP nýtir allt próteinið sem fellur til við fiskvinnsluna, hentar jafnt fyrir landvinnslu og um borð í fiskiskipum, er hagkvæm í rekstri og að mestu leyti sjálfvirk. Hægt að fylgjast með öllum þáttum framleiðsluferlisins með fjarvöktun í gegnum netið hvaðan sem er. HPP er hönnuð til að skila gæðamjöli með lághitaþurrkun og fiskolíu í hæsta gæðaflokki.

Þrjár stærðir verksmiðjunnar eru boði, HPP-300, HPP-1000 og HPP-2000. Talan gefur til kynna hráefnisafköst per klukkutíma, þ.e. 300, 1.000 og 2.000 kg af slógi, afskurði, heilum fiski eða öðru hráefni. HPP-300 getur unnið úr að lágmarki 7 tonnum af hráefni á sólarhring, HPP-1000 úr 25 tonnum og stærsta verksmiðjan afkastar að lágmarki 50 tonnum á sólarhring.

Fyrsta HPP verksmiðjan í endanlegri mynd hóf rekstur 2013 og sú næsta 2014. Smíði er lokið á tveimur HPP verksmiðjum til viðbótar og á árinu 2016 hófst smíði á fjórum verksmiðjum sem allar fara um borð í nýja frystitogara sem verið er að smíða fyrir íslenskar og erlendar útgerðir.